Lyssna

Ristagis jáhkko

Gieresvuohta l vuodo ja ulmme ristagis jáhkon. Gieresvuohta Jubmelis boahtá. Gieresvuohta iellemav vaddá.

Jáhkko la åssko

Ristagis jáhkko l åssko Jubmelij guhti ándagisluojttá ja gieresvuodav adná, guhti agev la lahka mijá viesodijn ja doarjju, bagát ja ådåstuhttá. Javlo milta ij aktak la Jubmelav vuojnnám. Jesus Kristusis ja suv viessoma bargos dåbdijdip Jubmelij. Buktep vuojnnet gut ja gåk Jubmel la. Rámáda subttsasa Jesusa birra li dan diehti sisadnon ristagis jáhkon.

Råhkålvis guoddá

Råhkålvis la ieme gäjnno jáhkkuj. Dån i dárbaha jáhkket råhkåma diehti, máhtá råhkålvisájn álgget.

Råhkålvis la rabás vájmmo ja vájnno Jubmelij. Råhkålvis máhttá liehket Jubmelijn ságastit jali aj nåk sjávot Jubmela åvdån årrot.

Råhkålvis máhttá liehket giehttot, gahtjat, viehkev ádnot, gijttet ja ihkap ållu ájnnasamos: ietjas Jubmelij guodet.

Härrá buorissjivnnjádus ja Härrá råhkålvis gávnnu oarjjelsábmáj.

Ristagis jáhkkodåbdåstus

Ristagis girkko dåbdås avta ájnna Jubmelij – Áhttjáj, Bárnnáj ja Ájlis Vuojŋŋanissaj – mij sjivnnjet, gádju ja iellemav vaddá.

Svieriga girkko l oasse väráltvijdes girkkos ja juohká ristagis jáhkkodåbdåstimev, ja hievet ájlis gålmaktesvuodav.

Jáhkov vuoset jáhkkodåbdåstime baktu bágoj ja dagoj, mij la árbbe apostalasj ájges. Jáhkkodåbdåstibme dan diehti vuoset jáhkov, gähttjalibme tjielggit sisano vuodov jáhkon, valla ij la jur jáhko diehti.

Gålmån vuorrasap jáhkkodåbdåstimen la sierra sadje mij vuoset jáhko ja girkko aktavuodav jahketjuodij milta. Apostalasj jáhkkodåbdåstibme oarjjelsábmáj.

Evangelak-luthera girkko

Svieriga girkko gullu evangelak-luthera árbbedáhpáj, mij aktijduvvá dåbdåstimtjállusijn Augsburgak dåbdåstibme jages 1530. Ådåstime ájge lij dåbdåstimtjálos njuolgga duodastus gåk vásstádusáv oattjo dan ájge gatjálvisájda jáhko baktu.

Om kristen tro på lulesamiska

Kärlek är grunden och målet i den kristna tron. Kärlek kommer från Gud. Kärlek ger liv. På den här sidan kan du på lulesamiska läsa om vad kristen tro är i en evangelisk-luthersk kyrka som Svenska kyrkan är. Bönen bär oss och i Bibelns berättelser om Jesus kan vi lära känna Gud. Sidan är på lulesamiska.

Rámát

Rámádin mij oahpásmuvvap valjijn giehtojs, lyrijkas ja boahtteájggeåtsådimijs ma aktan li almma vuodo ristagis jáhkkuj ja árbbedáhpáj.

Oabme testamennta

Hebrea rámát - mav ristagisá gåhtjudi Oabme tetamenntan -  máhttá buojkoduvvat umasse girjij girjjevuorkkán. Oabme testamennta giehttu umassláhkáj Jubmela dagoj birra histårjån ja ulmutjij viessomin.

Ådå testamennta

Ådå testamennta sisanet moattelágásj tevstajt. Aktisasj gájkajda l da li Jesus Kristusa birra. Giehttu birra majt Jesus javlaj ja dagáj ja gåktu suv sárnne oabblánij vuostasj ájge.

Áhttje Mijá – mij råhkålip råhkålimev ålles väráldijn

Jesus åhpadij mijáv råhkålit råhkålvisáv mij gåhtjuduvvá Mijá Áhttje. Ållusa gåhtjudi dav aj Härrá råhkålvissan jali Mijá Áhttje. Le råhkålvis masi mij máhttep guorrasit aktan gájkka ristagisáj ålles väráldin.

Sakramännta l ájlis dahko

Gávnnuji tjavgga båttå viessomin. Gávnnuji aj tjavgga båttå girkkolanján. Máhttá årrot gå soames gástaduvvá jali gå skallo juogeduvvá - dalloj dáhpaduvvá juoga sierralágásj. Rámáttevsta lågåduvvi råhkålvissan. Dálásj ájgge aktiduvvá majna Jesus javlaj akti.

Skallo – ájlis mállás

Gå mij duosstop lájbev ja vijnav de miján la aktisasjvuohta Kristusa rubmahis ja varás. Nåv lahka gasskavuohta l Jubmelijn. Skallo l ájlis dahko, rievtesvuoda ja doajvo gåvåstahka.

Gástadus la ájlis

Gástadus la ájlis dahko. Mij dahká gástadusáv nåv sierralágátjin la Jesus vuododij gástadusáv ja gåhtjoj mijáv gástadit.

Jáhkodåbdåstibme

Jáhkodåbdåstibme tjoahkkájgässá ristagis jáhkko l jáhkko gålmaktes Jubmelij: Jubmel Áhttjen, Bárnnen ja Vuojŋŋanissan.

Härrá råhkålvis – Herrens bön

Áhttje mijá guhti le almen.
Ájlistuvvus duv namma.
Båhtus duv rijkka.
Sjaddus duv sidot, gåk almen, nåv aj ednamin.
Vatte midjij uddni mijá bäjvvásasj lájbev.
Ja luojte midjij suttojdimme ándagis, nåv gåk mij aj luojttep mijá velgulattjajda.
Ja ale mijáv gähttjalibmáj lájddi, ájnat várjjala mijáv bahás.
Juhte duv le rijkka ja fábmo ja herlukvuohta ihkeven ájggáj.
Amen

Buorissjivnnjádus – Välsignelsen

Härrá buorissjivnnjedus dijáv ja várjjalus dijáv. 
Härrá tjuovggijus árudijás didjij ja årrus didjij ármmogis. 
Härrá jårggålus árudijás didjij ja vaddus didjij ráfev.
Áhtje ja Bárne ja ájlis Vuojŋŋanisá namán.
Amen

Apostolak jáhkkodåbdåstibme

Mij jáhkkep Jubmel Áhttjáj, gájkväksásij,
alme ja ednama sjivnnjediddjáj. 
Jáhkkep aj Jesus Kristusij,
suv ájnnariegádim Bárnnáj, mijá Härráj,
guhti ájlis Vuojŋŋaisás sahkanij,
niejdda Marias riegádij,
Pontius Pilatusa vuolen vájveduváj,
ruossinávlliduváj, jámij ja hávddáduváj, 
jábbmegij rijkkaj luojttádij,
goalmát biejve jábbmegij lussta tjuodtjelij, 
almmáj vuolgij, gájkviekses Jubmel Áhtje,
oalgesbielen tjåhkkåhime, 
dåppelt vas boahtemin viessojt ja jábbmegijt duobbmitjit.
Jáhkep aj ájlis vuojŋŋanissaj, 
ájlis aktisasj girkkuj, 
ájllisij sebrudahkaj, suttoj ándagisluojttemij,
jábbmegij tjuodtjelibmáj ja iehkeva iellemij.
Amen.

Nikenak jáhkkodåbdåstibme

Mån jáhkáv ájnna Jubmelij, gájkviekses Áhttjáj, 
guhti almev ja ednamav sjivnnjedij, ja gájkka majt vuojnnep ja gájkka mij vuojnemahtes le;
Jáhkáv ájnna Härráj, Jesus Kristusij, Jubmela ájnnariegádim Bárnnáj, Áhtjes riegáduvvam gájkka ájgij åvddål, Jubmel Jubmelis, tjuovgga tjuovgas, duohta Jubmel duohta Jubmelis,  riegáduvvam, ij sjivnnjeduvvam, sämmi luondos gå Áhttje, Suv baktu le gájkka sjivnnjeduvvam; mijáj almatjij ja mijá sálukvuoda diehti almes luojttádij ja almatja hámen bådij ájlis Vuojŋŋanisá baktu niejdda Marias ja almatjin sjattaj; mijá åvdås ruossinávlliduváj;
Pontius Pilatusa vuolen, vájveduváj ja hávddáduváj; goalmát biejve tjuodtjelij, tjáluga milta, ja almmáj vuolgij tjåhkkåhime Áhtje oalges bielen; dåppelt vas herlukvuodan boahtemin viessojt ja jábbmegijt duobbmitjit, gen rijkan ij nåhkåm le; jáhkáv aj ájlis Vuojŋŋanissaj, Härráj ja häggavaddáj, guhti Áhtjes ja Bárnes boahtá, ja guhti aktan Áhtjijn ja Bárnijn råhkåluvvá ja guddneduvvá ja guhti profehtaj baktu hålaj; jáhkáv ájnna, ájlis, aktisasj ja apostolak girkkuj. Dåbdåstav ájnna gástadusáv, suttoj ándagisluojttemij, ja vuordáv jábbmegij tjuodtjelimev ja boahtte värálda iellemav. Amen